IKEA（宜家家居）食品一向幾受大眾歡迎，當中最經典嘅瑞典肉丸價錢親民、味道出色，絕對係必食之選。最近美國IKEA推出限量肉丸味香薰蠟燭，以答謝忠實顧客嘅支持，唔知聞起嚟會唔會令人好肚餓呢？
為慶祝「IKEA Family」會籍計劃 10 週年，美國IKEA宣布舉行會員限定抽獎活動，並提供全新非賣品、「HUVUDROLL」肉丸香味蠟燭作為獎品。IKEA表示，公司將向1925位幸運兒送出一枝肉丸蠟燭，只要由即日起至8月22日登記成為「IKEA Family」會員，就有機會中獎。
圖片來源：IG@ikeausa
圖片來源：IG@ikeausa
唔講唔知，原來全球每年賣出嘅IKEA肉丸數量高達10億粒，足見人氣之高！去年疫情爆發初期，各地民眾都留家抗疫，無得外出用餐，IKEA就慷慨分享簡易版肉丸食譜，等大家可以喺屋企自製肉丸。另外，IKEA亦推出咗「素肉丸」，以植物性蛋白質食材打造瑞典肉丸口感，希望素食者都能品嘗到肉丸嘅美味。
IKEA素肉丸（圖片來源：IKEA官網）
Photo／IKEA官網、IG@ikeausa
