【now.com生活】屈指一算，原來自己做咗管理層已經有十年，認識嘅同事多達數百人，但幸運地呢十年同事相處嘅關係雖未至於融洽，但都叫做和睦。
剛出來社會做嘢嘅時候，正好遇上沙士，當時百業蕭條，唔好話要升職加薪，想低微地搵份工已經唔易，唔知係咪因為咁，我總覺得當時嘅職場風氣唔太好，打工仔或者低職位人士就好似一隻狗咁俾上司踩到一文不值，忍氣吞聲。
我仲記得當時我份工係喺一間電訊公司當電話服務員，主要工作就係聽電話去幫人訂演唱會門票，樂園門票等服務。當時有一個明星搞演唱會，某信用卡用戶可以優先訂票，所以一早返工就已經有幾百個來電等候訂演唱會門票，所有同事真係飲啖水都冇時間。
忙完一整日，超時工作到深夜諗住收工之際，當時嘅經理就要求所有同事留低，話收到投訴要大家留低處理。所有同事痴痴呆呆咁坐埋一齊，經理呢個時候就播放咗一段錄音出嚟，內裡有個客人要求訂演唱會嘅中前排座位，而同事就訂錯咗中後排座位，之後個客發現就打電話嚟投訴。
同事嘅目光轉到我身上，好明顯訂錯飛嘅職員正是小弟。
經理叫咗我企身喺同事嘅目光下大事質問，當中仲夾雜住無數嘅粗口，當時社會搵份工唔易，可以做嘅就係頭耷耷咁接受呢種公開凌辱，呢種感覺絕唔好受，曾經有一刻我灰到想搵窿捐，但我知道咁做根本冇用。
往後日子，當我晉升做管理層之後，我同自己講做人做事，不論自己或者下屬都要獲得應有嘅尊嚴，仲時常鞭策自己即使當權，亦唔可以肆意羞辱別人同別人嘅父母。
我相信呢個世界嘅打工仔冇人會想做錯嘢俾人鬧俾人罰，既然係咁，管理層做乜唔接受同事犯錯，一齊諗計補鑊。
記住，做錯嘢唔係因為你廢或者無能，只因你單純地係人而唔係機器。
做錯嘢要反省同提醒自己，錯一次便夠！
文：庸材
（八十後物業經理，網絡小說作家，喜歡平庸，更喜歡當塵世間迷途小書僮）
〈不是庸材〉每隔周四刊登
專欄屬作者個人意見，不代表本網立場。
