【now.com生活】「下台階」，係人與人相處中，一個好重要嘅技巧。
因為你愈大個，就明白「人要面、樹要皮」呢個道理，
而人愈大；愈要面。
好多人搞到老死不相往來，甚至發動一場辦公室戰爭，
都係嚟自「面子」兩個字。
前輩教落，
「贏」嘅最高境界係「比險勝高兩點」，
但「離大勝差兩點」，
令對方心服口服，亦不至顏面掃地。
而呢個「離大勝差兩點」，好多人會唔為意，
唔知你手下留情，唔知你想畀個位佢落台，反而追住嚟咬！
佢哋喺社會上係好易「出事」，
因為佢睇唔出別人釋出「善事」，
誤當對方係「無料」。
然後認為呢次勝負上，
對方只係僥倖，自己就有啲不幸。
就好似一場武士比試中，對方點到即止，但佢不自知，要求打多一次，
仲話晒畀全世界人知佢一定可以贏。
結果？
對方冇得揀，唯有將劍插入佢心房，用最短時間送佢一個「秒殺」。
好多時，成熟嘅人都唔會趕盡殺絕。
而真正將一個人趕盡殺絕嘅，往往係佢自己將下台階誤當成機會，想踩住上。
逼人殺佢。
做咗人咁耐，大家都明勝有時、敗有時。
今日你輸得徹底；
難保有日到我險象環生，
既然人哋畀個面你；
又何必攞架嚟掉呢？係咪？
文：張晨
（將最不煩的事變成超煩，就是我們的平凡。）
〈都市無情〉每隔周四刊登
專欄屬作者個人意見，不代表本網立場。
