【now.com生活】呢一句，好細個就聽過，但你好大個先學識。
記得大學時每個周末都做兼職，有一日心情極度低落，
喺公司我擺出一副死咗廿個老竇嘅樣。而同事叫我做嘢，我都抱住一個死灰心態面對。
當然，工作質素都係死灰級數，成個面口都「求安慰」，同時又任性，同事問我「你做咩呀？」
我又保持住「我冇嘢」呢個答案。
係，我想人擔心我。
想法很「細路仔」，但我當時也的確只係個「細路仔」。
午餐過後，經理終於出手，佢同我講咗一段說話，亦係一段我記到𠵱家嘅說話。
「我唔知道你生活發生咗咩唔如意嘅事，如果係好嚴重嘅，你應該留喺屋企休息吓。但如果你返咗工，就唔可以帶太多私人情緒。因為人哋係冇義務去了解你嘅心情。」
我當時依然保持一個「死老竇」，懶洋洋咁點下頭。
但慢慢再諗，都覺得經理有道理。
同事也好、客人也好，佢哋都冇需要顧及我嘅情緒。或者係由孩童年代，讀書地方都覺得自己係學生，身邊係同學，你有個錯覺呢個世界大家都應該Take Care你。
但呢個社會並無呢支歌仔唱。
自此就開始學乖，到大學Last Year去做Intern，有一日心情又係崩潰地傷感，
不過我再無擺出一副頹樣，一切裝作如常，完成手頭上嘅工作。
即使有時心一痛，眼一紅，都偷偷抹掉、自我處理。
有時諗法好簡單，只係覺得如果自己心情唔好，就大吵大鬧，令同事要做多啲，唔太公平。
嗰一刻，有種「長大咗」嘅感覺。
時間繼續流逝，我呢家都算係「老人家」，有時都會見一班新人會帶埋私人情緒返工，
當然我又唔會逼佢哋變一部冇感情嘅Working Machine。
但我都會講一句：「你做咩呀？有心事？講唔講得㗎，講得就拎出嚟傾吓，唔想講嘅就睇吓自己點處理咗佢，始終喺公司，有太多私人情緒並唔成熟。」
每個人，都曾經覺得「自己唔開心係大晒」，而當你明白「其實你真係唔係大晒」嘅時候，或者你嘅思想就開始蛻變。
文：張晨
（將最不煩的事變成超煩，就是我們的平凡。）
FB： https://www.facebook.com/birdnoup
〈都市無情〉每隔周四刊登
專欄屬作者個人意見，不代表本網立場。
