【now.com】世界,似乎存在住「第一個法則」。
咩係「第一個法則」?
就係唔同範疇遇到嘅第一個人,
往往唔會係最後一個人。
呢個法則,由小學已經開始運行。
記得當時要搭校巴,校巴入面有一個同班同學,仲要住附近。
唔使諗,佢成為咗小學嘅第一個朋友。
呢段車程,我哋有好多狂想。
不過,四年級轉班,加上我再冇搭校車。
慢慢,我身邊出現另一啲朋友;
當然,佢都係。
畢業嘅紀念冊,我有留一頁畀佢,但優先度已經唔算高。
到最後一秒,我已經唔Care佢存在於畢業禮嘅邊個角落。
當然,佢都係。
到中學,又係另一個宇宙,一開始識咗班朋友,成為lunch同伴。
亦好自然咁,圈子慢慢多,中學幾年,飯腳換咗好幾次。
到最後,初時嗰批朋友已經降格成「唔太熟嘅同學」。
大專大學,都係一樣。
第一個交換電話嘅人,多數唔會陪你走到最後,
甚至只係為對方開路,好早段已經四散。
都啱嘅,唔同地方都要同伴。
反正唔使簽長約,一開始但求就手。
有幾何,一開始就搵到對的人?
正因為有「第一個法則」,
我哋其實了解「由好Fd變唔Fd」嘅過程多於「由唔Fd變好Fd」。
某個夜晚,又好自虐咁逼自己,諗返起同小學「第一個」嘅相遇,
嗰種同生共死嘅感覺,再對比畢業之時嘅冷靜同冷漠。
一時之間,都分唔清自己係一個咩人。
「永恆」呢個詞彙實在太遠,唔好講宜家,
即使小學六年,都已經暗藏人生百態。
人,依然變得很快。
而且這種改變,總是雙方面。
只係,呢個同學嘅全名,我依然記得。
或者「第一個」雖然冇行到最後,但始終有個位置。
比第二個第三個第四個都幸福,
當然,呢種幸福對佢嚟講,並不需要。
對我嚟講,亦都一樣。
文:張晨
FB: https://www.facebook.com/birdnoup
〈都市無情〉每隔周四刊登
專欄屬作者個人意見,不代表本網立場。