【now.com】有日，一位姨姨入到嚟診所。
佢行埋嚟登記處：「喂，肥妹，登記呀」
我打咗個突，居然咁親切呀：「哦～好呀，未睇過嘅係咪？身分證登記啊」
佢：「冇帶身分證喎，我住附近咋嘛」
我：「你要唔要病假紙收據㗎？」
佢：「梗係要啦！唔係我嚟做乜呀肥妹？」
乜你又咁親切咁嗌我呀……
我：「咁一定要有身分證明文件㗎～回鄉卡有冇呀？」
佢：「咪玩啦肥妹，我都話住附近囉，點會拎呢啲嘢呀肥妹？」
我：「冇身分證明文件嘅話，冇得拎假紙收據嘅，你返屋企拎咗先再嚟啦～」
佢：「我住好遠㗎喎？你唔係要我行返去呀肥妹？」
你思覺失調呀？頭先又話附近，而家又話好遠，你揀定住邊未呀？
我：「你又話住附近嘅……」
佢：「⋯⋯喂！肥妹你好冇禮貌喎！你搵第二個話得事嘅嚟我講呀！」
哦，好呀，我搵大家姐。
大家姐行岀嚟，姨姨：「阿肥⋯⋯」
姨姨都未跌得岀個「婆」字時，就已經俾大家姐截住佢道氣：「嗌邊個呀你？」
姨姨未知衰：「你話得事㗎？阿肥婆，我就冇帶身分證嘅要假紙收據，你照登記睇咗先，我趕時間㗎！頭先個肥妹已經嘥咗我好多時間㗎啦，我冇乜時間再同你拗。」
大家姐冇回應，但又繼續望住姨姨。
姨姨同大家姐你眼望我眼咗半分鐘，性急姨姨開口：「肥婆？你聽唔聽到我講乜呀？」
大家姐繼續冇反應。姨姨：「肥婆！肥婆？喂？我趕時間呀！」
大家姐邊行返入嚟邊用眾人都聽到嘅聲量問我：「岀面個傻婆嗌邊個呀？要唔要報警呀？佢好似走失咗喎？」
姨姨：「死肥婆！你玩嘢呀？我唱到你失業呀」
登記處久久冇人理佢～佢重覆講咗幾次「唱到你失業」就走了。
失業可以點唱？「啦～啦～啦～我要佢失業啦～呀～呀～呀……」
是這樣嗎？
文：寶豬姑娘
（中女珍寶豬，任職診所助護超過十年，經常使用逆向思維參透世事，包括……細閱大家姐。）
FB：https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場
