【now.com】有日，一位小姐嚟到登記。佢一行埋嗰吓，我已經覺得佢好香氣迫人……引起我嘅鼻敏感發作。
我個鼻好似俾好多毛毛蟲撩緊爬緊呀～「乞痴～乞痴～乞痴」，我個鼻失守了。
小姐退後好幾步：「你冇嘢呀嘛？」
我紙巾掩鼻，諗住單手打字繼續登記：「冇嘢，鼻敏感啫」
小姐：「你唔好掂我張卡住！唔好掂呀」
我：「我去洗個手，你等等呀」
小姐望住我行開，應該係自己同自己講，但係我又聽到：「請埋啲有病嘅做乜呀？診所嚟㗎～」
其實我都係人嚟嘅，我唔係機械人……
我拖住sad sad嘅身軀行去洗手間，大家姐望到我又喺度包雲吞，就問：「又鼻敏感呀？」
我：「嗯」
去完洗手間，見到小姐正在被大家姐「調教」……
我問正在鬼鬼祟祟食花生嘅醫生：「佢哋做乜呀？」
醫生：「佢哋喺度玩碧麗珠呀，應該就快成枝唧晒」
我：「點解呀？」
醫生：「佢（大家姐）話要驅蟲就拎走我枝碧麗珠啦」
我：「殺到蟲㗎咩？唔係拎嚟抹你張立立令皮櫈咋咩？」
醫生：「個女人都俾佢省到立立令啦，枝碧麗珠係我自己買……」
又係喎，我哋繼續食花生啦。
大家姐使岀真功夫，向天唧唧碧麗珠，口中唸唸有詞：「好臭好臭！好大陣味！」
小姐掩鼻：「你唔好再噴啦，好大陣味啦」
大家姐繼續唧唧：「你聞唔到好臭咩？」
小姐：「我淨係聞到你陣味咋」
大家姐：「我送呢枝俾你呀」
（醫生聽到甚為緊張同我講：「枝碧麗珠我㗎！」）
小姐：「點解呀」
大家姐：「你個鼻淨係索到呢隻味，就拎呢隻做香水啦」
小姐冇岀聲。
大家姐：「至少你會知自己已經夠味，唔會再咁重手呀，你都唔知自己而家幾咁臭。」
大家姐放低咗枝碧麗珠入返嚟……
醫生繼續被無視：「枝碧麗珠我㗎！」
冇人理你呀，自己買過啦！
文：寶豬姑娘
（中女珍寶豬，任職診所助護超過十年，經常使用逆向思維參透世事，包括……細閱大家姐。）
FB：https://www.facebook.com/jumbopig14
〈豬事八卦〉逢周三刊登
專欄屬作者個人意見，不代表本網立場。
