【Now新聞台】西班牙甲組足球聯賽，皇家馬德里主場6比1大勝馬略卡，開季六場不敗，以2分壓過馬德里體育會升上榜首。
開賽只是3分鐘，趁馬略卡球員未站穩陣腳，賓施馬把握機會替主場的皇馬先開紀錄，馬略卡今仗防守力弱。
洛迪高一腳被連拿擋出，還有阿辛斯奧補中，24分鐘皇馬領先2比0。
相隔1分鐘馬略卡就由賀柏助攻給南韓國腳李剛仁，射過古圖奧斯追近一點，新加盟的李剛仁成為近12年來首位攻破皇馬大門的亞洲球員。
但皇馬技勝一籌，賓施馬彈給阿辛斯奧，射入他今場第二球，不用半小時，皇馬領先3比1。
10歲時已經在馬略卡踢青訓的阿辛斯奧換邊後，再接應賓施馬，個人大演帽子戲法，入三球不慶祝，55分鐘皇馬領先4比1。
賓施馬季初狀態已經好好78分鐘背脊控球再起腳，省到人後「笠入」。西甲入球達200個，這位33歲的法國國腳今季六場聯賽入8球，交出7次助攻，超越美斯及C朗，成為21世紀西甲前六輪參與入球最多的球員。伊斯高84分鐘替皇馬「埋齋」，6比1大炒馬略卡。
西維爾迎戰華倫西亞同樣很早就入球，阿歷亨度高美斯3分鐘攻入領先一球，之後蒙迪亞在右邊出球省到人，但無人接應之下就彈入了15分鐘主隊領先兩球，華倫西亞無好好檢討，接應長傳的米亞快腳踢入，22分鐘西維爾拉開到3比0。
華倫西亞只能靠一次死球戰術由杜羅破蛋，西維爾仍然贏3比1。
