【Now新聞台】英格蘭超足球聯賽，修咸頓主場2比0，擊敗紐卡素，賽後修咸頓以較佳得失球差，壓過同分的利物浦，第一次做英超「一哥」。
紅衫的修咸頓，有首席射手丹尼京斯，因為膝部做手術缺陣，但無有怕，獲加比達斯篤走皮球，禾確特傳中，阿當斯「窩利」建功，是他今季第三個聯賽入球，開賽7分鐘領先紐卡素，被愛華頓外借到來的禾確特，相隔14年重返母會修咸頓。
完半場前，接應真尼普的直線，禾確特控定一抽，距離他回歸後入的第一球，只是差些少。
去年10月，修咸頓在聖馬利球場這裡，對李斯特城輸九球，他們上季最終得第11名。相隔一年，竟然可以有機會上榜首。
領隊哈辛赫圖稱，他們無投資好多金錢，付出最多的是努力，修咸頓季初連輸兩場後就保持不敗。
踢得被動的紐卡素，82分鐘還有朗史達夫解圍嘆慢板，隊友亦幫不到手，岩士唐找到一條私家路，射過達奴，修咸頓全場八次中目標攻門，換來兩個入球。
相反紐卡素只得兩次中目標攻門，包括祖亞寧頓的頭槌，都過不到阿歷斯麥卡菲，修咸頓最後赢2比0。
聯賽取得六場不敗，還可以「過榜首癮」，以較佳得失球差，壓過同分的利物浦，近32年來首次登上頂級聯賽榜首。
至於藍衫的白禮頓迎戰般尼，先有主場門楣頂住馬菲路頓的斬中球，而白禮頓雖則多達19次攻門，但卻未能換來一個入球，包括韋碧克三番四次的埋門都無功而回。
兩隊最終互交白卷，般尼今季七戰未嘗一勝。
