【Now新聞台】英格蘭超級足球聯賽，熱刺作客憑住孫興敏入兩球，3比2反勝阿士東維拉，排在第五位。
希望擺脫降班危機的阿士東維拉開賽9分鐘有個好開始，艾加斯的傳中迫到艾達維特「擺烏龍」，熱刺早段落後。
但在27分鐘就憑住一個角球攻勢追平，艾達維特將功補過，轉身抽近柱入網，總算抵銷之前的「烏龍球」。
熱刺完半場前還有反超前機會，新加盟的比亞芬爆入禁區，博到安高斯犯規，球證透過VAR證實是十二碼。
主射的孫興敏第一腳被拉爾拿救到，再補一腳就無力挽回。這位27歲的南韓國腳成為英超首個入球總數達到50大關的亞洲球員。
但維拉還未絕望，換邊後一次角球攻勢，輪到安高斯幫自己將功補過，53分鐘頂入成2比2，以為可以在熱刺身上分到1分，但安高斯不爭氣，漏油讓孫興敏得益。
補時近4分鐘推入禁區射過拉爾拿，繼足總盃第四圈重賽對修咸頓，孫興敏連續第二場攻入絕殺球，在英超入球累積51個，是首位入球超過50的亞洲球員。
熱刺反勝3比2聯賽排第五位，領隊摩連奴稱，可以想想爭下屆歐聯席位。
