【Now新聞台】英格蘭超級足球聯賽，阿士東維拉主場兩球淨勝紐卡素，結束三連敗，升上第15位。
今季執掌紐卡素的布魯士13個月前被阿士東維拉解僱後再回到維拉公園球場。但紐卡素一開賽就被他的舊東家壓住來踢，杜格拉斯路爾斯的射門被杜巴卡單手托出，阿士東維拉上半場控球高達七成。
復出的隊長加利殊禁區邊博到耶連犯規，維拉獲得罰球。
由賀利咸及加利殊合作處理，射過人牆近柱入網，賀利咸32分鐘協助維拉領先，杜巴卡視線受阻下只能目送皮球入網。
之後又是加利殊突破，今次在左邊博到費蘭迪斯犯規，又有罰球射。
賀利咸開去龍門口，黑白衫前柱大漏，艾加斯近門建功，這位上季里爾的借將今季正式與維拉簽約四年。
維拉前36分鐘靠愛爾蘭中場賀利咸一個入球加一個助攻，輕鬆領先兩球。
缺少受傷的後衛兼隊長拿錫斯，紐卡素完半場前有破蛋機會，但費蘭迪斯頂個彈地波，過不到希頓的十指關。
換邊後仍然有機會，辛麥斯文射遠柱，又給希頓單手瓦解，紐卡素今場5次中目標的攻門全部被希頓「截糊」。
其實客軍門將杜巴卡今場亦有6次撲救，令到維拉下半場未能拉開比數。
但後防給別人這樣輕鬆搓散，杜巴卡封到韋斯利近門一腳後都相當激動。
總算有驚無險，維拉最後贏2比0，結束三連敗，兼升兩級到第15位，紐卡素就排第14。
