【Now新聞台】截至早上11點，1小時內《彭博》用戶關注度上升最多的港股，依次為眾安在綫、雲頂香港、中芯國際、國泰航空、金山軟件。
台積電股價近期發威，一度帶挈港股同業股價上升，上星期華虹半導體曾上榜，今日就輪到中芯，噚晚內地業界有單大新聞，就係紫光集團最新獲內地法院批准重組，估計涉及千億資產，唔知中芯有冇「幫手」？
京華山一國際研究部主管彭偉新認為，中芯有機會「幫手」，因為內地希望業界「有錢出錢、有技術出技術」，盡快收拾紫光呢個爛攤子，並維持技術自主。雖然市場認為中芯好大機「幫手」重組，不過，單靠同業「幫手」就可以完成重組嘅機會唔大，所以可能會同其他內地資本合作。
佢又話，中芯今日股價大升，見到資金對重新買入中芯好踴躍，資金流入嘅活躍度係近個幾月最勁，反映市場似乎睇好中芯。
