【Now新聞台】截至早上11點，1小時內《彭博》用戶關注度上升最多的港股，依次為盛京銀行、華人置業、中國石油、中國石化、花樣年。
有兩隻同中國恒大債務危機有關嘅股份佔據榜首。恒大公布旗下子公司出售盛京逾17億股非流通持股，套現近100億元人民幣。
重點睇下華置，今朝抽升33%後中途停牌，話要等公司發內幕消息。CEO、大劉太太陳凱韻(甘比)自上周起連番減持恒大股份，累計套現6.1億元，持股降至4.68%。
而外電報道，中央據報計劃爭取國企收購恒大部分資產，會唔會係有國企背景的投資者接咗甘比貨？對華置而言，呢筆投資係咪搵到出口？
耀才證券研究部經理譚智樂認為，國企入股恒大機會好微，因為中央出手只係想避免系統性風險，而唔係保住整間集團，更指投資者應該趁恒大系股份未停牌前走貨！
至於華置今朝爆升，Arnold認為係有資金憧憬公司估值低殘，有機會考慮私有化，認為恒大甩手唔會刺激到股價升咁多。
