【Now新聞台】截至早上11點，1小時內《彭博》用戶關注度上升最多的港股，依次為藥明生物、福萊特玻璃、美團、移卡及江西銅業股份。
藥明係今早最大跌幅藍籌，因為主要股東今年第二度減持，如果由去年初計，已經係第6次減持，雖然仲守到配股價107元，但股價一度低見107.1元。
京華山一國際研究部主管彭偉新指，以前每次股東減持、入貨都有賺嘅講法，今次就有較大不確定性，因為藥明股價依家唔喺低位，但又未上返頂位，主要股東就減持套現，過往減持後會創新高嘅情況未必會出現。
佢又話，依家唔少藥股都唔平，加上喺現時嘅市況下，唔再係長升長有，好難出現「一浪高一浪高」嘅形態，後市要留意藥明會唔會跌穿配股價。
