【Now新聞台】截至早上11點，1小時内《彭博》用戶關注度上升最多的港股，依次為龍源電力、建設銀行、華潤啤酒、澳博控股、康方生物。
龍源股價今早一度急插16%，主要受國家能源局日前出台嘅諮詢文件影響。文件内容可能會影響風電及光伏發電今年嘅裝機、上網嘅電量同電價。文件其中一個重點係，各省要預留三分一嘅保障性併網規模畀現有項目，而相關企業要減少，甚至放棄補貼先可以攞到併網資格。
安山資本資產管理部董事黃志陽指，近年中央推動零排放、碳中和等，令投資者對新能源行業有憧憬，呢份諮詢文件令人聯想到國家想減補貼，由於新能源嘅生產電力成本較大，如果要放棄補貼先可以併網輸出電力，基本上每生產一度電都蝕錢。
