【Now新聞台】截至早上11時止，《彭博》系統Top Search No.1是中銀香港，第2至第5位分別為廣汽集團、恒安國際、洛陽鉬業及華能新能源。
港股第二季開局認真麻麻，恒指一開市就跌穿30000關，睇返全球股市各主要指數，除咗MSCI新興市場指數仍然錄得正回報外，標指等指數一早已跌入負回報區。
Now財經台評論員趙善真話，全球經濟仲未去到大蕭條咁嚴重，只係2009至2018年一直處於牛市，所以依家大市回套，投資者唔係太習慣。
趙sir又話，新興市場表現似乎唔錯，原因係美元弱，令大量資金湧入新興市場，不過，如果中美貿易磨擦持續，新興市場第二季未必可以再跑贏全球。
