【Viu】COLLAR兩女神Ivy So蘇雅琳、Candy王家晴噚日再孖住同日出歌，兩口子更sweet爆話：「希望下首歌都可以一齊出，有人陪伴冇咁驚。」係愛呀！
Ivy solo情歌《原地拖手》由舒文監製、吳林峰作曲、女神再度親自填詞，講一個女仔暗戀男仔，然後所諗出嚟嘅古靈精怪嘢，胡思亂想，有啲心動，又有啲覺得自己諗太多，好矛盾嘅狀態。」女神都大方爆有試過暗戀人：「小學暗戀過一個孖仔嘅哥哥，佢係足球隊長，好charm。」
MV仲邀請同樣係今年進軍樂壇嘅港隊「花劍世一」Ryan蔡俊彥客串，對於二人首度合作，Ivy笑稱蘇媽比佢更興奮，又指覺得Ryan真人巧cute，同接受訪問時兩個樣。而Candy新歌《燈神》亦係「虐心」嘅愛情故事，由Wyman黃偉文填詞。MV就搵嚟合作過嘅舞台劇演員梁嘉進玩拍拖，頭貼頭、拖手等等sweet畫面一個不漏，Candy話係熟人先可以令佢唔怕醜放開i人一面。
不過Candy話最sweet反而係父母投票一致通過新歌好聽喎！佢仲話發現媽咪之前喺屋企喪loop佢上首歌《直白》添！巧warm呀！
