【Viu】Sammi鄭秀文一連兩場巡唱吉隆坡站喺噚晚開鑼！相隔10年再到當地開騷嘅Sammi著住閃令令歌衫靚爆登場，並以《發熱發亮》揭開序幕，全場觀眾立即熱血沸騰！佢話大馬觀眾應該好少睇四面台，相信觀眾們可以感受到當中嘅不一樣！
Sammi喺唱《不要驚動愛情》時，提到家姐、中學同學、印尼親戚都有到場，有愛啊！開騷期間，有觀眾大嗌安仔 (許志安)，Sammi甜笑回應：「安仔無嚟呀，佢好忙要做騷。安仔加油，我今晚都要加油！」 Fans喺完騷時大嗌encore，相當寵粉嘅Sammi返上舞台向大家揮手道別，然後再送上《值得》，正啊！
Sammi喺完騷後受訪：「今晚好感動，好似見返啲舊朋友，差唔多10年冇喺大馬開騷，今次兩場觀眾都咁熱情，啲飛又好快賣晒，都係我無諗過，所以今日既感動又興奮。」 佢亦話今次近200人團隊飛吉隆坡開騷，將製作原汁原味搬過嚟，話好多謝公司支持，又大讚觀眾熱情！
