【Viu】姜濤嘅《KEUNG TO "LAVA" LIVE TOUR 2026》多倫多站噚晚圓滿落幕，成個演唱會簡直係驚喜浪接浪！首先最搶鏡嘅「觀眾」，一定非姜媽同姨媽莫屬。兩位孖公仔咁現身，仲著住一套紅噹噹嘅戰衣，喜慶到爆，明顯係嚟撐寶兒嘅。姜家人見到兩位阿媽級人馬駕到，即刻齊心大叫「奶奶」，聲勢相當浩大！
除咗獻唱《追愛狂想》同埋《蒙著嘴說愛你》等歌曲之外，姜Admin早排喺活動上神神秘秘劇透話會有首「兩個字情歌」送俾大家，原來就係林曉培嘅經典金曲《心動》。唱完之後，姜Admin感性mode話：「大家要好好珍惜自己愛嘅人，呢首歌都係講關於少少嘅遺憾，人係世上都會有好多遺憾，可能會有嘢得唔到，雖然過程會好痛心，唔單係愛情，親情都係，希望大家都用平常心去面對所有嘢，好好珍惜坐你隔離嘅親人、情人、兒子，你地最需要珍惜嘅係你身邊嘅人，將我永遠只要擺第二第三第四位，唔好將我擺第一位，將你地親人、生命中最緊要嘅人擺第一位！」
但感動過後，姜Admin即刻化身「熱情嘅熔岩」，因為佢請咗表妹Angelina做嘉賓，一齊跳《Every Single Time》。呢晚表妹著住黑色戰衣，大騷美好身材同長腿，一出場已經引嚟尖叫聲不絕。當姜濤扶住表妹嘅纖腰，兩個人嚟咗段大膽嘅貼身舞，氣氛即刻hot到爆！
跳完之後，姜Admin仲忍唔住喺台上真情流露，大爆表妹嘅童年趣事。佢指住表妹笑住話：「如果唔係因為呢個機會都唔會請到我表妹上呢個台，好嘢，好感人！細個我哋兩個成日打打鬧鬧，但係又會一齊唱歌。我又發現咗好多一啲細個嘅片，我最近喺屋企，因為我阿媽錄咗幾十餅，你哋以前嗰啲帶，你哋從來冇睇過。但係我喺度諗緊幾時放出去，但係應該係，因為我要諗下幾時播。」全場fans隨即起哄嗌「公開！公開！」
片段來源：Vancouver 糖、IG@kt_music_support_team
