【Viu】泰國烏汶叻公主殿下 (Her Royal Highness Princess Ubolratana Rajakanya Sirivadhana Barnavadi) 連同兩位頂級BL男演員Mew Suppasit Jongcheveevat、Tul Pakorn Thanasrivanitchai，趁舉行FILMART年度盛事嚟到香港宣傳泰國娛樂事業，希望提升港泰娛樂產業之間嘅合作機會！
不得不說，烏汶叻公主為推廣堅係不遺餘力，喺活動期間開金口獻聲，十足成個Mini concert咁！烏汶叻公主唔止揀唱泰文歌，仲唱埋「歌姬」鄧麗君首本名曲《月亮代表我的心》，搞到全場所有人都鬼死咁high，係咪真係可以免費聽公主唱歌㗎？而Mew、Tul亦獻唱兩首泰文歌，全程都勁冧豬豬㗎！
Mew、Tul孖住受訪，原來Mew短期內連飛咗嚟香港兩次出席event，日前佢仲搭地鐵由尖沙咀去車公廟拜車公，果然10個泰國人，10個嚟香港都要向車公請安呀！Mew話因為泰國同香港好近，已經嚟過香港10次，一有時間都想過嚟拜神咁話！
講到日前佢哋連體嬰咁去米蘭參加fashion week見到萬人迷碧咸，Mew同Tul心心眼咁話同到碧咸集郵好開心，又大讚碧咸個樣好童顏、個人又nice，Tul仲話傾偈嗰陣個心肝仔卜卜跳勁緊張呀！至於問到佢哋有冇興趣拍香港電影，Mew就指住Tul話honey想拍動作片，而佢自己亦好鍾意香港電影嘅氛圍，有機會嘅話都想把握！祝你哋願望成真啦！
