【Viu】天命最高！要大家久等啦！電影《尋秦記》殺到埋身啦！聖誕節正日搵嚟兩師徒，「項少龍」古天樂同自稱寡人嘅「秦王」林峯嚟分享拍後花絮、拍攝趣事！聽聞拍《尋秦記》電影版係古老闆嘅心願，究竟又係唔係呢？
《尋秦記》考古熱潮浪接浪，仲好記得林峯當年受訪話係第一次拍古裝，事隔廿幾年再拍返登基場口，佢話係專登重現呢一幕，仲話係大家嘅集體回憶！至於當年成日爆肚嘅古生，喺今次又有冇騷吓幽默咁呢？佢亦透露呢次電影版刪剪咗好多出嚟，有冇得將被cut嘅「復活」，就要靠大家集氣啦！
雖然係原班人馬上陣，但話晒都叫承接一個「經典」，當中有冇困難之處？加上今次都加插多位新角色，劇本上最大難處又喺邊度？有冇邊啲原角色係想「翻生」，就例如係江華？對喺戲中再見到「烏博士」廖啟智身影，古生坦言有遺憾呀！
講到呢兩師徒嘅關係，林峯指戲裏、戲外關係一樣，唔知佢喺古老闆身上又學習咗啲咩？對老闆仲有冇恐怖？跟住笑指感覺現實中好似得宣萱鎮得住古老闆，當事人又認唔認同呢？
另外，今次兩師徒難得可以合唱主題曲《天命最高》，古生話個契機係嚟任林峯紅館騷嘉賓，仲爆埋當中做嘉賓嘅趣事添！而古生喺鏡頭前就漏口風話出新歌，希望古生做個找數真漢子，講得出做得到啦！新歌暫時就未有得聽，但足本訪問就有得睇，咁你識揀啦？喺度祝大家Merry Christmas！
