【Viu】37歲Anita崔碧珈同58歲「大隻Rocky」鄭健樂新戀情曝光後，今日喺荃灣出席慈善音樂會記招，佢受訪時透露屋企人今年移民咗去英國，所以佢大部份時間都喺歐洲，11月先返港，因為要演出呢個音樂會，要唱歌跳舞想身形靚啲，就搵咗Rocky訓練，就咁認識咗！
但再講Rocky，Anita就話私人事要低調，冇答依家有冇拍拖，但如果結婚就一定會公開！咁Rocky喺facebook tag佢公布戀愛中，代表啲咩呢？Anita話自己都係瞓醒先知，又話對方點諗咩佢唔知，所以都唔答對方啲嘢，每個人都有用社交媒體嘅自由，自己覺得始終公眾人物，私人事就可以keep返自己甜蜜知道就ok！
咁不如講吓Rocky有咩好？Anita甜絲絲咁大讚佢係暖男，有愛心又單純，知道佢好努力為小朋友！咁有冇嬲對方公開關係？Anita話自己唔係咁易嬲，再強調Rocky係一個好好嘅朋友，「依家係好好好好嘅朋友，大家在心中就得！」佢又形容Rocky係佢遇過最高分嘅異性，「係好熱情單純嘅人，需要時間相處，自己著重溝通方面，never say never，追求長遠關係」，再讚不絕口：「覺得佢係好好嘅爸爸，好顧家，好少呢種男性喺香港出現」，佢話同Rocky兩個患自閉症小朋友未見過面，但會準備聖誕禮物，佢亦同Rocky傾過好多同自閉症兒童嘅相處添！講到咁都唔係拍拖？點先係？快啲睇足本訪問啦！
