【Viu】哈囉喂劇場《請勿打擾》x「恐怖在線」現場版今日最後一日公演，分晏晝、夜晚兩場！按照「傳統」，「鬼王」潘紹聰率領一眾主演阿Dee@ERROR、Candy@COLLAR、麥沛東、Eric梁嘉進等，喺完場後再次現身謝幕，之後由阿Dee、Candy、Eric各抽一名幸運兒上台影大合照！
自稱喺尾二呢場元氣滿滿嘅麥東，落力狂sell蘇粉，仲即場拆盲盒送畀觀眾添！Candy就密密派心冧台下晴天蛙蛙，「電力」無限呀，而阿Dee臨離場前更收到「羊群」送嘅花！
謝幕後緊接就係「恐怖在線」現場版，呢場邀請到坐喺台下嘅Poki上台做嘉賓，潘聰仲搵埋阿Dee出嚟一齊講鬼故！Poki一口氣講咗兩單親身經歷靈異故事，仲笑講金句：「人一世物一世，如果有機會撞一次鬼，都試啦！」講講吓仲燒埋「碌炮」呢疊，果然有料呀！
至於守尾門嘅阿Dee則分享咗當年拍團綜《花姐ERROR遊2》去柬埔寨嗰陣，夜晚喺酒店房瞓發生人生唯一一次「被鬼砸」！阿Dee憶述當時成個撞嘢過程，最好笑係佢順便「投訴」埋瞓隔離床嘅193扯晒鼻鼾唔救佢！Poki就話同肥仔同房係唔會遇到呢啲事，點解嘅？莫非佢哋陽氣重啲？想知就睇實況片啦！
