【Viu】一連兩日嘅《Hi MIRO! 見面祭 2025》第三回噚晚喺西九文化區自由空間開鑼，噚晚Lokman楊樂文、Alton王智德、Tiger邱傲然同埋Frankie陳瑞輝型爆登場，除咗進行粉絲福利環節，仲請嚟DJ Steffunn同大家一齊開夏日Party，「文勁虎皮」唱出《IGNITED》等多首正歌，焫著全場！
MIRROR「忙內」虎仔稱一直都感受到哥哥們對佢嘅愛，幾位哥哥即時分享如何優待虎仔，Alton稱：「我體諒佢。」Lokman緊隨話：「我原諒佢。」Frankie則道：「我遷就佢。」「雨天家族」果然有愛！講到「第二小隊」團綜，虎仔透露：「團綜我覺得最大嘅得著，就係我同大表哥嘅關係幾何級數咁樣上升，好多上刀山、下火海嗰啲，都係我同表哥去負責，所以我同佢有好多相處嘅時間，同埋共過患難。」
而Frankie亦話喺「FING小組」團綜都有突破，皆因有好多運動自己都未試過，「我獻上咗好多第一次，其實佢哋已經做得好好，咁我就要好努力去catch up返佢哋嘅Level，其實都有啲吃力，但係好好玩！」
喺劇集《社畜再培訓先導計劃》 同小朋友發展忘年之交嘅Alton表示，對家庭生活有憧憬，「如果你話係家庭，我覺得唔係單靠成員去組織嘅，係你個家庭本身要有愛。所以你有愛嘅話，其實男定女都冇乜所謂，但我會鍾意女仔。」
至於Lokman則為嚟緊嘅舞台劇《我推的男子》努力排練，「排咗大概兩個禮拜，之前都係排啲位置、走位，而家真係開始排戲喇，排戲之後就開始要鑽研角色。今次我哋係用一個BL去⋯⋯」即時令全場尖叫，Lokman續道：「冷靜啲先、冷靜啲先！即係要去了解呢個世界，要消化下，消化之後再要去諗用咩方法呈現，而家喺呢個過程，開始品嚐到啲啲咁樣。」
