【Viu】George歐鎮灝、Marco葉振弘、「阿妹」岑樂怡、Kathy仔、阿蛋@Lolly Talk、亨仔、Martin王智騫今日出席ViuTV新劇《翻盤下半場》記者會，George同Marco好開心P1X3L有份唱劇集主題曲，笑言去年錄音《有你未為輸》嗰陣仲未完約環球，估唔到播出時講中晒大家嘅心聲，但對組合嘅前途都樂觀嘅，依家唯有趁等待機會期間自我增值囉！
至於阿妹就話呢套係自己完約前最後一套劇，但都有繼續同ViuTV合作其他節目，目前以自由身接Job，大呻搵食艱難呀！Kathy仔就開腔回應同Dixon黃奕晨嘅緋聞，希望大家畀啲空間，總之目前生活愉快，大家明啦！講到阿妹日前去咗睇舞台劇《笨蕉大劇院》，佢就代好友柯煒林更新近況，指對方開始食標靶藥後反而仲精神；Kathy仔都話Will依然鬼馬搞笑，希望「柯 The Best」啦！
此外，最近憑台灣BL劇人氣急升嘅Martin，誠邀亨仔加盟BL巿場，點知亨仔爆笑回應，想知就睇足本訪問啦！
