【Viu】ViuTV新劇《社畜再培訓先導計劃》勾起唔少社畜嘅共鳴，麥沛東、唐浩然、Giann羅允芝同「泰妹」楊雅文齊齊化身「小學雞」，同一班小朋友打成一片外，唐記同泰妹嘅「打者愛也」感情線另類得嚟又深刻，充滿粉紅色泡泡！
至於麥東都唔執輸㗎，可以同網絡女神談情，仲公開爭取獻出螢幕初吻，咦？咁大膽唔驚畀太太扭耳仔咩？麥東嘅求生意識都唔低嘅，即刻出招補鑊，仲「轉軚」話同唐記組限定男團「安久」唔夠喉，希望可以拍BL劇咀日本男神木村拓哉喎！而Giann就笑認今次係「幻愛」，希望下次挑戰GL劇，同泰妹談情就Perfect喇！
最後四位齊齊推舉同劇邊位演員係「終極小學雞」，「受害者」Giann仲大爆「狼王秘史」，想笑餐飽就睇足本訪問啦！
