【Viu】Tyson Yoshi噚日出席婚紗展活動，除咗同觀眾玩遊戲，唱向太太Christy嘅求婚歌《would you be mine? 》，仲有同主持傾下偈，被問到籌備婚禮難忘事，Tyson好坦白話難忘在冇咩籌備，所有嘢都係太太搞，佢仲教各位準老公「問答求生術」：例如老婆問邊種花好，如果答完B之後老婆再追問「真係咩？」，咁就要改答A，咁樣實冇死！佢又話總之籌備婚禮最緊要聽晒老婆講，就算唔係好care，都要扮到好care，係生存之道，可以放空但要記住啲keywords，因為女士好鍾意喺男士忙緊時問呢啲問題，答佢咩話就好易會著！
講返喺意大利三日婚禮，第一日welcome party，第二日就正式婚禮，第三日就farewell party，喺泳池邊chill吓，Tyson話自己最鍾意第三日，因為距離收工不遠！問到婚禮誓詞係咪最代表自己對Christy講嘅說話？佢竟然答唔記得咗自己寫咗啲乜！
咁有咩感動moment？Tyson話當見到Christy著婚紗行落嚟嘅時候，唔知點解忍唔住眼濕濕，好似睇佢嘅演唱會咁，即係有人同自己講睇Tyson演唱會會喊，嗰時唔明對方喊咩，行禮嗰日就唔知點解喊咗，可能係一樣感覺！快啲睇現場實況啦！
