【Viu】Dee哥何啟華聽日就35歲啦，羊群們今日提早為佢送上蛋糕慶祝，氣氛高漲！Dee哥一出場就戴上黑超擺pose，之後仲轉look大騷麒麟臂，引來全場尖叫聲！
主持旁白君問Dee哥點解咁瘦，佢就直言：「辛苦，我都唔知點解咁瘦，可能有部份嘅人都知我拍緊戲，我嘅角色其實唔應該係咁瘦，應該係食多啲嘢去肥，然後我拍咗某幾場戲之後，我就開始地獄式咁去拍戲，就慢慢變咗瘦，但係其實係好事嚟，因為上鏡係好睇好多㗎，依家咁樣上鏡啱啱好、好好睇！」Dee哥預告呢齣電影係佢人生一大突破，仲話會令fans們願意睇50次！之後，佢又預告自己有份主演嘅舞台劇係編劇為佢度身訂造：「對白好似係我自己諗出嚟！」佢話希望可以畀大家睇到佢最好睇嗰一面，又話希望可以提名、攞獎！
到「講經」環節開始前，Dee哥著返件外套分享近況，講自己嘅演員狀態係前所未有咁fit！之後，佢提起今年頭半年嘅失敗，坦言ERROR演唱會中嘅talk show令佢耿耿於懷，佢覺得係做得唔好、諗得太大，「我想做嘅嘢，其實唔係呢個時候可以做到嘅嘢嚟。」
Dee哥繼續講：「其實頭半年本身有好多工作排好晒，亦都因為排好晒，我就推晒所有新嘅工作，幾個禮拜之後就同我講呢個工作都冇埋，個心情又再跌一格。」佢直言慶幸仲有廣告工作，話上天待佢不薄！喺未有工作時，佢開始睇儒家、道家思想，希望可以改變好差嘅心情。佢話做完《甚麼是喜劇》音樂會後，就消化到負面情緒、得到好大滿足感！
Dee哥再講到道家思想嘅「無為」，即係要觀察要行邊一條路，佢之後再有感而發：「人生會面對好多囷難，我哋會以為佢係困難，但係我哋唯一可以做就係感受佢，係唔係一件值得做嘅事。當係值得做嘅事，件事帶畀你就係順利，就係所講嘅無為，你覺得係啱就行。」
