【Viu】現年47歲嘅Philip伍允龍，今年5月尾突坦認撻着細13年嘅「咪神」Renee李蔓瑩，而其實早喺公布戀情前，二人曾被捕獲甜遊主題樂園，咁啱今日佢哋重遊拍拖之地出席電影首映禮，首次以情侶檔亮相成焦點，惟二人堅拒一同受訪，合照時都顯得一臉尷尬，典解嘅？
一頭金髮嘅Philip同Renee分別都話怕醜，Philip更指肯一齊出嚟對佢嚟講已行出一大步，唔知遲吓有冇機會見到佢哋情侶檔接job？笑問功夫了得嘅Philip有冇教吓女友防狼術？佢man爆秒回！Renee就表示男友獲得佢芳心全因三招，冧爆大讚Philip滿分！咁唔知佢哋係點識㗎呢？邊個主動追求？告白過程係點？已見雙方家長？
同場仲有「香港隊長」古天樂，戴住茶色眼鏡chok爆登場，但佢事前講明不受訪！另外，King@C AllStar單拖現身，問到最近有冇慰問釗峰？佢就話有send message問候，暫時都係畀啲時間兄弟，等釗峰自己處理！佢指都係見到報導先知發生咩事，同釗峰前度兼化妝師唔相識，會唔會覺得兄弟今次處理感情事失當？適逢今年係C AllStar 15周年，會唔會有合體計劃？
Lyman呢晚帶埋靚靚老婆Zoe到場，講到完成Viu Original英語新劇《THE SEASON》拍攝，佢沾沾話拍得好舒服，最大原因係英文對白，唔使出動拼音！佢透露戲中主要同林嘉欣對戲，當中有咩難忘事？《全民造星VI》籌備得如火如荼，Lyman有冇見過班師弟？佢又有咩tips開心share畀佢哋？想知就睇足本訪問啦！
