【Viu】天后林憶蓮《迴響 Resonance》2025巡迴演唱會澳門站噚晚開鑼。儘管颱風「韋帕」逼近，仍無阻樂迷熱情，全場爆滿。憶蓮以極具穿透力嘅歌聲演繹《赤裸的秘密》同埋《歸零》等多首經典金曲，令觀眾聽出耳油。憶蓮喺演唱會尾聲分享心聲，並希望透過歌曲，為大家帶嚟勇氣同力量，「如果未來嘅日子裏，你有任何時刻覺得迷失、傷心，或者唔知點算好嘅時候，希望你哋記得今晚，記得呢啲歌曲。我哋一齊聚集喺呢度，我哋嘅愛同埋力量、勇氣，希望你哋會記得，如果唔開心嘅時候可以有用去幫你哋重新reset。」
噚晚澳門站係憶蓮《迴響》巡演嘅第16站，亦係首個大型室內場館演出， 有別之前15站戶外場，觀眾難得可以超近距離欣賞。即使氣象局預告午夜懸掛八號風球，觀眾仍然無懼風雨，完場後更兩度要求Encore，成功打動林憶蓮，成為首站有二次Encore福利！
林憶蓮感動地多謝樂迷，「今晚可能會唱到天光？哈哈！出面係咪打風？幾多號風球呀？3號？！大家今晚係咪唔返去？我聽到有人好大聲嗌《微涼》，我覺得今晚又打風又落雨，大家咁辛苦嚟到，本來個rundown唱其他歌嘅…..你哋等等先！」寵粉嘅佢先問問演唱會監製倫永亮意見，商量後即拍板加唱《微涼》，以報答樂迷風雨中仍堅持到場支持。 另外由於颱風「韋帕」逼近，為顧及演出團隊同埋所有觀眾安全，今晚(20日)一場演出取消並延至7月25號舉行。
