【Viu】陳慧琳一共10場《陳慧琳Season 2萬人結界演唱會》噚晚嚟到第7場，請到張家輝做嘉賓。Kelly之前以「垃圾婆」Look驚喜現身張家輝主演嘅《贖夢》謝票場，今次佢再以黑色膠袋Look登場，令家輝搞笑話可以開返齣《贖夢2》。家輝表示10年前做過Kelly演唱會嘉賓，10年後再做，希望每10年都參與一下，仲可以拉二胡或者彈琵琶添！
家輝指自己係「唱跳歌手」，Kelly即一臉疑惑並笑稱家輝應該係「電影歌手」，之後喺大螢幕上播出佢嘅經典電影唱歌畫面，包括《化骨龍與千年蟲》、《金雞SSS》同埋《中華賭俠》。隨後，兩人一齊合唱《眼睛想旅行》，家輝哥開頭企棟棟唱快歌，與旁邊不停跳的Kelly形成強烈對比，但突然家輝「澤西哥」上身大晒強勁舞步，配合Kelly一齊跳唱，令全場觀眾瘋狂尖叫！
家輝笑稱「唱跳歌手」有幾款，自己係「擘開嚟做，唱還唱，跳還跳」，然後沾沾話跳舞有專業水平，「自己本身都有啲天份先得」。接住，佢化身「菜心強」獨唱《永遠的失眠》，歌癮大發嘅佢又話會開一場個唱俾大家入場再聽多啲，「江湖再見！」咁話，真係正！
