【Viu】Kelly陳慧琳嘅10場紅館騷，噚晚第3場嘅嘉賓就係林峯！佢哋合唱《再生花》之後，林峯多謝Kelly邀請，令佢可以還清嘉賓債！阿峯透露今次係佢哋第4次合作，最早可追溯到2007年喺北京嘅演出！
阿峯分享：「 Kelly工作好認真，當時我好緊張，記得我哋一共排咗一個禮拜，因為要跳舞，希望下次合作我哋可以跳舞。」Kelly隨即乘勝追擊，話下次可以代替周秀娜為林峯跳舞！Kelly之後仲喺大屏幕公開舊相，指控阿峯「抄襲」，佢話：「你而家做演唱會一定要攞張櫈出嚟做『表演』 ，但你睇我，我喺2007年已經有凳啦，你抄我！」阿峯即時承認Kelly先係「櫈舞」始祖，全場大笑。到Kelly落台換衫，阿峯再唱出《愛在記憶中找你》！
另外，Kelly喺唱完《最愛演唱會》後，就表示自己今次嘅演唱會喺social media洗晒版，並覺得幾安慰。佢仲話：「當然要多謝每一位觀眾，10年之後都會再嚟紅館撐我，多謝你哋。仲要有啲唔係睇1場，係可能睇晒10場，多謝晒。」Kelly感動落淚，亦有向觀眾鞠躬表達謝意！
