【Viu】教主Anson Lo嚟緊7月7號就30歲仔喇！盧瀚霆國際後援會今日開始至7月11號喺又一城舉行生日展覽《Anson Lo & Sontos - Together We Glow Popup Store》。
展覽有9大打卡位，一入場就俾個粉紅色巨心包圍住，兩個mon播住撈撈舞台演出片段，齋睇都已Hot！會場亦設「自製生日卡」，俾神徒s製作專屬生日卡；仲有即場隨機抽教主閃卡、製作紀念鑄幣。行到餓咁點？場內有紅粉緋緋Fortune Cookies賣，打開包裝就有唔同籤文，都係由撈撈親筆寫㗎，OMG！
另外仲有大型展板闡述撈撈多年嚟攞過嘅獎同歷年回顧；人形撈撈紙牌亦畀大家任摸唔嬲。而後面就有神徒專屬相冊，滿載撈撈多年來嘅靚仔相，仲有Cute爆幼稚園相，中間更夾雜撈豬親手畫嘅插畫添！最期待當然係每年由撈撈親手寫俾神徒嘅家書啦！手寫外，佢今年更會「親口」同大家講悄悄話添！「記得飲水呀」聽到都甜晒！仲有6位神徒有情深說話同撈撈講，想知就睇現場實況片啦！
