【Viu】Thor駱振偉喺4月宣佈同丹麥籍太太Katrine結束5年婚姻，今日為Ian同Marf嘅活動擔任主持時回應事件，佢話由於二人當年喺丹麥註冊，所以目前正辦理離婚手續，同Katrine再見亦是朋友，目前寄情工作，今個月都直踩22日冇假放，相當充實！
Thor透露早排去丹麥拍節目時，被社交網站提醒9年前嘅同一日，正正係自己首次同Katrine去丹麥嘅日子，難免觸景傷情，仲同幾日後身處丹麥嘅前妻緣慳一面，但自己都有約前姨仔同前妹夫食飯，兩家人亦一早了解晒佢哋選擇離婚嘅原因。
對於網友見到Thor同朱康喺《破．地獄》慶功宴激咀後，笑言終於明白Thor點解離婚，Thor就話求放過，事關自己同朱康只係老Best，仲自爆咀到收駱媽媽「奪命凶鈴」，笑Cry呀！
不過Thor不諱言自己一直有同志巿場，離婚後仲收多咗類似示好訊息，又開心share埋蘇民峰師傅幫自己批命嘅內容，想笑餐飽就睇足本訪問啦！
