【Viu】影后衛詩雅、Will柯煒林同Phil林奕匡今日出席名錶活動，曾經喺《Food Buddies》上演激烈床戲嘅詩雅同Will，一直Friend底，詩雅仲直認每日望住Will嘅靚仔相化妝，但就婉拒再同Will拍親熱戲，驚老公周醫生嬲豬喎！
阿Will就自認樣衰，所以周醫生唔批准，又「反擊」細細個就睇詩雅拍《四葉草》系列，認真鬼馬！Will又大呻同軟硬天師合作嘅舞台劇，連自己父母都冇飛，陰功豬！
講到周醫生喺社交網站自爆兩年前進行手術後細菌感染，至今仍有後遺症，詩雅親自還原手術過程，仲話睇到筷子咁大嘅針拮落老公尾龍骨，自己都忍唔到喊，而呢個後遺症隨時要截肢，好彩依家行得走得咋！詩雅亦感激老公忍住腰痛陪自己現身金像獎，同埋完成兩日婚禮，以及忍受自己嘅脾氣，所以唔止老公覺得搵到賢妻係「三生有幸」，自己都覺得識到周醫生係三生有幸！
此外，Phil今日40歲生日，佢話囝囝健康就係最好嘅生日禮物，加上首次以爸爸身份過父親節，意義非凡！當問到佢想唔想追多個？佢就眼都凸埋喇！想開開心心就睇足本訪問啦！
