【Viu】林峯一連七場紅館騷《GO WITH THE FLOW 林峯演唱會》去到第3同第4場，阿峯繼續勁歌熱舞、大唱經典歌之外，仲分別邀得Dear Jane、MC張天賦做嘉賓！
前晚第3場，阿峯唱出由Dear Jane結他手Howie作曲嘅《樓下有人》，Dear Jane四子突然升上台，造就主音Tim同阿峯驚喜合唱！阿峯話佢哋同一間唱片公司之外，早喺2021年前就合演劇集 《天涯俠醫》，舞台上嘅mon亦出現劇照，成為焦點！Tim當時演阿峯好友，可惜當時佢係零對白。阿峯望完阿Tim當年嘅樣就忍唔住問：「你點解越嚟越後生嘅呢？」佢又話：「我角色同你係Friend，但你點解唔搵我做主診醫生？所以咪走咗囉。」之後Dear Jane唱出《你流淚所以我流淚》，現場氣氛keep住高漲！
到噚晚第4場開騷前嘅晏晝，《九龍城寨之圍城》「秋哥」任賢齊百忙之中抽空探阿峯班，好有心！到夜晚開騷，阿峯同嘉賓MC張天賦合唱完《馴獸師之王》之後，MC就話佢同阿峯都係射手座，話自己就係早一個星期，阿峯回應：「即係你大我一個禮拜。」講到「跪凳」，阿峯即興教MC跳「椅子舞」，自稱「華納舞王」嘅MC只好臨場獻技，阿峯就建議將來要同MC合作跳唱歌，相信Fans們會好期待！MC喺跳完舞後就獨享舞台，唱出《懷疑人生》！
而向來寵粉嘅阿峯，喺每晚完騷後都會去到紅館場外向粉絲們大派福利，仲為幸運粉絲送簽名，全力滿足大家！
