【Viu】久未露面嘅「白姐姐」白韻琹，今日同老公謝偉俊（Paul）齊齊出席長者活動，現年80歲嘅白姐姐相當精靈咁同大家揮手派Good，受訪時仲話見到咁多人好開心，不時活潑回應：「唔話你知！」白姐姐不單哼咗幾句歌仔，仲喺台上爆Paul哥哥約其他女仔食飯，依舊風趣！
對於有傳白姐姐患上腦退化症，Paul哥哥表示白姐姐除咗短期記憶比較模糊，其他指數都良好，笑言仲健康過自己，所以平時都有一齊出街飲茶食飯，閒時仲有打吓麻雀仔添！
至於「John哥」姜大衛、李琳琳同姜卓文一家三口現身，仲大派利是畀「老友記」。講到金像獎，琳琳姐直言失落女配角獎唔失望，最開心係見到有一班年輕演員接棒；但係細John就戥媽咪失望喇！至於John哥就講返同哥哥秦沛一齊頒獎，畀細佬「小寶」爾冬陞「老點」嘅趣事，想知就睇足本訪問啦！
