【Viu】《第33屆香港舞台劇獎頒獎禮》今晚喺灣仔舉行，風車草黑心喜劇《Di-Dar》共獲8項提名，主演葛民輝、梁祖堯、Ahdee湯駿業同邵美君都有出席，「橋王」阿葛仲拎埋把尺嚟「度橋」，笑爆全場！「葛校長」爆笑回應《Di-Dar（Comeback)》搵咗黃秋生演校長一角，笑言可能破完地獄變「人肉叉燒包」，仲建議阿祖同Ahdee出叉燒包紀念品，甚至移師專做神功戲嘅戲棚加場，大癲呀！
至於點解唔再做校長呢？阿葛就話因為暑假有嘢搞，咦？咁係咪「軟硬天師」開騷呢？商台出身嘅佢就爆笑話係約咗區瑞強參加港台嘅《太陽計劃》，SLDPK呀！
而「鬼王」潘紹聰就回應曾經合作嘅七仙羽師傅被指詐騙一事，雖然冇聽過有朋友同七師傅合作後發生不愉快事件，但都講到滴晒汗，而自己亦從來唔敢介紹師傅畀網友。
此外，區嘉雯對於失落金像影后唔失望，最開心見到好多舞台劇演員有提名同得獎，尤其係「最佳男配角」朱栢康嘅得獎感言最有共鳴。蘇玉華同潘燦良亦讚朱康實至名歸，同時好開心電影業界覺得劇場出身嘅演員「好用」。
