【Viu】謝霆鋒一連四場《Evolution Nic Live進化演唱會》今晚起強勢登陸啟德主場館，作為香港首位喺啟德主場館開騷嘅歌手，同4萬3千fans同歡！首場大約喺夜晚7點55分開始，戴住黑超嘅霆鋒喺台中chok爆登場，歌衫走casual路線，演唱會Tee配牛仔褲！霆鋒打頭陣就唱《不要說謊》，唱到《改造人》仲嚟個全場大合唱！
唱《活火山》前見霆鋒先揀把靚結他，身後大螢幕亦呈現咗個活火山，配合前台噴火效果，現場氣氛超hyper！之後霆鋒同全場打招呼，笑言好耐冇見，見到大家都好似冇乜點變，勁識氹fans！佢又講到同大家識咗廿幾年，再三笑問大家頂唔頂得順喺接落嚟嘅兩個鐘一齊high！
英皇Family齊齊撐爆大師兄謝霆鋒，包括張敬軒、容祖兒、蔡卓妍、關智斌、Gin Lee、衛詩雅、洪卓立等！同場仲有MIRROR「五鏡」Jer、Jeremy、AK、Alton、Stanley同大表嫂Alina，同埋DJ Donald、梁文禮等！
另外，官方紀念品喺晏晝1點半喺場館外發售，吸引唔少fans提早入場搶購，排頭位嘅男fans更係一早10點就嚟到買黑膠同唱片；嚟自四川、42歲嘅忠粉朱小姐，着到一身應援look，佢話由1998年就鍾意霆鋒，好開心可以搶到飛入場，講講吓仲激動爆喊，愛得勁深呀！
