【Viu】《風車草黑心喜劇Di-Dar (Comeback)》今日舉行記者會，公佈將於8月載譽歸來，除咗梁祖堯、湯駿業、邵美君同Sica外，仲加入「大師兄」黃秋生同ERROR隊長Fatboy助陣，新鮮感十足！
秋生笑言今次係幫葛民輝做「替工」演校長一角，估唔到跳唱連場，笑言咁啱有道具棺材，方便自己跳到猝死可以直接瞓棺材，果然百無禁忌呀！笑問有冇覺得Fatboy「肥得嚟幾可愛」？秋生大讚Fatboy好Cute，又封Sica做「性感擔當」，仲話有睇姜濤反讚自己有型嘅訪問，覺得佢怕怕醜醜咁好得意，寄語前輩們多鼓勵後輩，唔好批評咁多，Respect呀！
此外，秋生仲暢談喺杜琪峯生日會撞返好多老友，到底邊個「斜」住走呢？睇足本訪問就知啦！
