【Viu】COLLAR成員Candy、ROVER成員亨仔、希晉今日同Tsoul 出戰《公司逼我打籃球》嘅「公司盃」四角邀請賽，「愛晴當入樽」首次以隊服現身，Candy透露係由193設計，所以呢套係「壹玖衫」，都幾好笑呀！
Candy講返睇Marf做Coldplay演唱會暖場嘉賓嘅感受，仲分享坐公司高層隔籬傾咗啲乜，又話好榮幸有份拍金像獎宣傳片，但喺戶外凍足幾粒鐘，差啲暈咁滯呀！
至於ROVER就首次回應喺《CHILL CLUB推介榜 年度推介24/25》表演失誤一事，亨仔同希晉多謝Jason嘅長文寫出大家心聲，又笑言批評反而令ROVER多咗人識，仲承諾會繼續進步，直至Haters收聲為止，Tsoul都高呼撐ROVER呀！
此外，翟威廉離巢後首度亮相ViuTV節目，陳安立同周志文仲建議威廉拍「愛情運動節目」，咦，有諗法喎！
