【Viu】Do姐今日出席連鎖傢俬店活動，分享煲劇必備Item，仲大呻呢排鬧劇荒，冇乜好作品可以推介畀電台聽眾咁話！講到早排同《口水多過浪花》團隊去杭州旅行，Do姐話原本想去自己家鄉重慶，但因為機票問題而改去杭州，雖然天氣唔好，但遊西湖都幾Chill，仲買咗好多靚茶葉，又親解同內地男神肖戰Poster合照嘅原因，So Cute呀！
對於網友想再睇Do姐同小鮮肉拍旅遊節目，佢就反問：「邊度仲有小鮮肉？」又坦承「其實自己一個更開心」，仲分享埋自己嘅旅行禁忌添！
此外，Do姐表示有傳短訊慰問丁父憂嘅好友吳君如，希望對方節哀順變，亦坦言冬叔主持嘅六合彩係香港人嘅集體回憶。
