【Viu】《2025香港電影導演會年度頒獎典禮》今晚喺尖沙咀舉行，全場頒發十個大獎，當中《破．地獄》擸走三個大獎，包括影帝、影后同最佳男配角獎，相當威水！許冠文封帝後受訪，坦言見到惠英紅頒獎就估到自己拎獎，皆因兩位係首屆金像獎影帝影后，仲話連外國都未試過「一家三口」齊齊整整上台，又話唔會諗定金像獎，事關享受沿途風景最緊要！至於攞男配嘅朱康同封后嘅詩雅都因為得獎而變喊包，亦希望承大家貴言，喺金像獎再下一城！
而獲最佳女配嘅小谷同最佳新演員Dylan都話估唔到會得獎，小谷感謝秋生老師嘅教導；Dylan就笑言冇「爸爸」青雲電話，通知唔到對方，但希望一家人再合作，想知係咩題材就睇足本訪問啦！
