Tyson Yoshi推出今年頭炮歌曲《1994》，打造具90年代風格嘅曲風、歌詞同場景，仲請埋好友游學修、YT周殷廷、Cloud雲浩影演出MV，Tyson仲豪花近百萬打造電影級數嘅動作戲、飛車戲，仲有江湖兒女愛恨情仇！
Tyson親解創作概念：「《1994》正正係描述30歲嘅我，原本歌名叫《浚彥》（Tyson本名程浚彥），係我嘅專屬歌。首先一定要全廣東話，其次一定要好有男人味，而且今次《Rocket 666》係搖滾專輯，除咗外國嘅搖滾元素，最後一首『埋齋歌』一定要回歸香港風格。曲風同歌詞都係向90年代嘅搖滾歌曲致敬，我仲特登聽咗足足一星期Beyond、王傑同太極嘅歌，先可以寫出《1994》！」因為朋友聽完唔係好信佢係認真想出呢一首歌，於是佢將歌詞改得比較摩登、改為搵其他歌手合唱。
Tyson話本身諗唔到同自己一樣Man嘅男歌手，點知竟然喺商台門口一抬頭就見到YT，對方一口答應Featuring，令成首歌平衡得更好！佢驚訝YT相當好戲，又大讚Cloud有氣質，演反派嘅修哥就被佢封為「定海神針」！
講到MV嘅飛車戲，Tyson話：「買咗一部跑車，只係揸咗兩次，就奉獻嚟拍MV嘅炒車場面，哈哈！信用卡都碌爆，銀行戶口接近破產邊緣！」雖然千金散盡，但Tyson拍出戲癮，話同朋友一齊演戲比較舒服、容易進入狀態，希望將來有機會拍電影兼挑戰做反派！
