【Viu】劉溫馨、龐景峰、方泳琳、陳張敏、李綺雯、梁愷傑、陸雪恩、吳景聰今日出席ViuTV全新真人秀《大力情人》記者會，亦係龐景峰同劉溫馨首次公開戀情。兩位仲喺訪問度大耍花槍，龐景峰狂讚溫馨傻氣又可愛，仲爆爸爸錢小豪喺新年見「未來新抱」嘅趣事，自己亦去咗日本拜會溫馨嘅媽媽同外公外婆，亦憑精打細算本色成功入屋，睇嚟兩位都好事近㗎喇！
至於李綺雯笑言今次拍埋ViuTV節目後，終於做匀咁多個電腦台，仲喺未婚夫梁愷傑面前公然話想同小鮮肉合作，反被男方踢爆佢遲遲唔肯嫁。想趁新年感受吓肉麻到骨痹嘅感覺，睇呢段足本訪問就啱晒喇！
