【Viu】由「黑哥」姜皓文、老婆殷寧「孕育」出嚟嘅賀歲片《哈哈哈新年喜戲》今晚舉行首映禮，佢哋話呢個「BB」真係得來不易，「大肚婆」殷寧自爆多次情緒激動爆喊，又話同老公黑仔嗌咗好多次交！但兩公婆又點會有隔夜仇呀？姜太仲貼心安排咗兩位女神宣萱、Dada陳靜嚟同黑哥演感情戲，講到興起更爆埋有床上戲添！殷寧有冇監場？黑哥見住老婆坐隔離又有冇老尷先？
惟香港票房有限公司今日表示，今年賀歲檔嘅票房較去年同期跌37.1%，表現令人失望，黑哥指對票房冇壓力，冇分爛片同好片，主要係睇觀眾嘅口味！
同場吳家樂呢日就係嚟撐黑哥，直入主題講到最近佢同鄧兆尊喺網台節目大爆有女星同時同6個富商拍拖，最後意外大肚獲「掟煲費」600萬，片段出街後引起極大迴響，搞到全城猜猜她是誰！家樂話今次的確追問多咗，話一講到姓氏嘅tips就即刻截停，點到即止咁話！家樂跟手又自認口疏，所以完咗節目都冇問係邊個，對網民競爭女星為某陳姓女星，家樂話都有睇到，但就呼籲大家唔好再估落去，怕影響到對方屋企！
至於講到佢喺網台節目談及五索，家樂話節目內容係緊貼娛樂新聞，利申唔會踩住人上位！而當中緊貼嘅包括王賢誌早前自爆破產，重提二人曾傳緋聞，家樂又點回應？足本訪問ready好啦！
