【Viu】由翁子光執導，劉青雲、谷祖琳主演嘅電影《爸爸》上映兩個禮拜，票房突破1200萬。「謝票小隊」呢幾日繼續努力到各區謝票，剛過去周六喺尖沙咀圓方的謝票場，導演同男女主角與觀眾互動以及回答問題。青雲開心講到而家有一對「仔女」，覺得係一個好好嘅經驗，「你話講我啲仔女，我都覺得好touching，我遇到好好嘅演員、導演。」對於電影搞喊唔少觀眾，翁導自認離譜 ，「其實呢齣戲都係有啲喪盡天良嘅，因為大家睇嘅時候真係都好難過，有啲人話返到屋企都仲喊緊，因為佢哋可能諗返啲畫面，有幾次我哋謝票就搞到劉生都流眼淚。」
青雲又被問到點樣掌握戲中複雜嘅情緒，佢突然被戳中淚點，並哽咽話：「我成日都覺得個爸爸，都唔知個爸爸究竟有冇真係憎過個仔，因為一家人好難，好難去分。我諗作為一家人，如果你係爸爸嘅，你應該好理解中間嘅感情係好混埋一世，根本就無所謂嘅寬恕，你老豆對你嘅真係你無辦法還。」翁導稱劉生感觸唔係一次，青雲直言因為觀眾俾佢嘅feedback好震撼，「我唔知道原來我哋，譬如謝票係商業行為嚟㗎嘛，點解大家可以咁短時間裡面有咁感情嘅交流，我覺得係好amazing，證明電影係一件好得意嘅事，即使我咁硬朗嘅，咁冷傲嘅人，講到自己嘅仔女都頂唔順。」
現實中，小谷胞弟曾因為思覺失調而輕生，佢指拍呢齣戲幫咗自己好多，又表示驚恐症發作過幾次，「我以前都好嚴重嘅，好多人問我作為媽媽，點解要接呢齣戲？我其實真係有認真諗過，因為對於我嚟講其實好傷害，當然角色係唔傷害，但係對於我個人嚟講，要勾返我好多嘅嘢，其實對我嚟講好殘酷，但係我覺得原來你肯面對嗰樣嘢係過渡嘅。我以前好多時候都會好恐懼，自己嚇自己，跟住就Panic Attack，跟住就透唔到氣、全身飆汗，試過幾次係咁。但係我拍畀個仔斬嗰場，我諗係終極嘅恐懼，如果係真嘅話，咁我真係面對佢。我發覺原來又OK，我自己驚嗰幾日，原來醫好咗自己嘅驚恐症。」佢同時又多謝青雲嘅鼓勵，「其實喺現場佢見到我嘅死人樣，佢成日都話：『小谷你唔好害怕行過森林啦，得嘅。』」
