【Viu】賀歲片《祥賭必贏》今晚提早做冬兼團年，有張繼聰、「阿Sa」蔡卓妍、Stanley@MIRROR、朱栢康、「修哥」胡楓、麥子樂、林耀聲等！阿聰透露呢晚會有抽獎環節，幽默笑話準備咗十億，繼而篤爆有圈中小富婆之稱嘅阿Sa準備咗幾層樓添！唔知Stanley同朱康又會唔會跟隊呢？
阿Sa啱啱開完北美tour返港，遲吓就又再飛英國開騷，笑話啲時間亂晒大籠！講到佢喺北美遇上6級大地震，阿Sa直言一開始以為係撞鬼，之後再繪影繪聲咁還原返成個過程，喺隔離嘅阿聰仲有配合內容做埋面部表情，咁盞鬼得唔得㗎？阿Sa更開心share佢生日正日去賭場玩咗兩手，倒贏25蚊美金即刻割禾青，係醒嘅！
大表波、朱康學阿聰到時謝票帶定個袋去，咁就睇吓邊個嗰袋利是最大啦！佢哋劇透戲中有2、3場對手戲，朱康個角色仲係混血兒嚟添！咁究竟係邊兩個地方混埋一齊？大表波就大賣關子話朱康有畀咗啲嘢佢飲，想知就要入戲院睇啦！
講到《破·地獄》票房衝破1.22億，主演之一嘅朱康話好開心，希望港產片可以keep住呢個勢破落去！至於對有指戲中太多吸煙鏡頭，朱康就婉拒回應啦，演員都只係跟劇本演繹啫！嚟緊喺電視機又會見到Stanley，新作港版《無用的謊言》即刻播出，接住佢又拍緊《IT狗2.0》，開心話有好多新嘗試！
另外，阿聰聞「阿嫂」林明禎失場首映禮一事，佢指唔方便評論啦，只可以講之前同明禎跑宣傳，見到對方病到嘔即刻去吊完鹽水再歸隊，覺得佢係一個專業嘅演員，希望件事快啲告一段落！
