【Viu】久未露面嘅Kary吳雨霏今晚現身品牌聖誕亮燈活動，距離對上一次出席公開活動都有一段時間，Kary直認都好掛住大家，只係唔捨得離開小朋友啫！冇再簽公司嘅佢自爆呢段時間都有喺studio寫緊歌㗎，不過就笑指進度緩慢，抵死自嘲產量唔及生仔，但就勝在慢工出細貨！
嚟緊3月好姊妹Stephy開紅館騷，Kary趕唔趕得切寫起到時上埋台做嘉賓先？佢自稱的確係有啲技癢嘅，又可唔可以集齊9塊餅一齊跳唱《心急人上》？Kary笑答冇嘢係冇可能㗎，只要係Stephy出到聲就得，不過佢就唔接受再做一件事！而Kary又指有見過Stephy嘅男朋友，大讚佢哋好襯，唔知Kary有冇份催婚？
Jeffrey魏浚笙呢晚擔任亮燈儀式嘉賓，咁啱今日係女朋友兼經理人生日，Jeffrey又有咩表示？最近成日都見到煨Sir，今年佢仲唔係豬籠入水？Jeffrey怕醜笑話依家係喪儲錢⋯出歌嘅階段，每首歌郁啲都要6位數字㗎！咁煨Sir幾時儲錢結婚先？
講到佢同「豪記」洪嘉豪首合唱歌《我感覺到》新鮮滾熱辣推出，見二人喺張song cover入面哄到極埋，唔知笙記有冇想咀落去嘅衝動？點知笙記笑話佢有吞咗一啖口水，亦feel到院長含羞答答！
籃球女神Mandy譚旻萱雖然着住件冷衫，但中間開咗唔少蠱惑窿窿，會唔會凍親個心肝仔㗎？提到所屬嘅組合Me&最近推咗首聖誕歌，但只得Feanna同Vian，引嚟網民猜測Mandy係咪退咗團？想知Mandy點回應就直接睇足本訪問啦！
