【Viu】由旦哥鄭丹瑞、Fish廖子妤、Jay Fung馮允謙，仲有Amy盧慧敏同阿正主演嘅電影《得寵先生》，早前同啲狗演員一齊舉行開鏡拜神儀式！風趣幽默嘅旦哥同班年輕演員打成一片，演佢囡囡嘅Fish大爆拍攝現場播旦哥其中一首名曲《留給最愛的說話》，佢話：「播讀白『濕滑嘅司機 粗心大意嘅馬路』，旦哥就會問我哋『係咪想聽Live？唔做！』我哋好期待佢現場演繹，但佢又唔肯。」Jay就話：「我知道旦哥出過歌，聽講係香港第一代Rapper！」
旦哥1993年推出歌曲《那夜我替女兒「R」背脊》，佢話：「我查過Rapper意思，即係『數白欖』，我係第一代『數白欖』，你哋摩登啲咪叫Rapper囉！『那夜我替女兒R背脊⋯⋯』我用羅文、鄭少秋腔，『R得佢舒服⋯⋯』」
阿正發揮主持本色訪問各人對前輩旦哥合作嘅所學，Fish大讚旦哥：「高、靚仔、好脾氣、好肯教新人、成日請我哋飲咖啡，太多優點，我真係唔想離個劇組！」旦哥笑話：「你數緊MIRROR？我係第十三人？」Fish強調係真心話：「同旦哥合作大壓力，但又好易入戲，我哋有幾場戲一見面就要面左左，剛才拍嗰場，喊到不得了，多謝旦哥。」旦哥回應：「佢投入到，我希望佢有80分，結果佢做到120分。」阿正指爸爸係旦哥鐵粉，佢話：「我依家企喺旦哥隔離好光榮，Hello Daddy媽咪！」
首次拍電影嘅Jay Fung，同Amy演情侶，佢分享感受：「今次第一次拍電影，感覺比我預料中好，雖然我唔係好多戲份，但都會無得瞓覺和好大壓力。我同Amy對手戲較多，同佢合作好舒服，佢無嫌我做得唔夠好，仲成日鼓勵我，多謝Amy！」Amy回應話：「我點會嫌你呀」，睇嚟一班演員今次合作得好開心，仲好有火花呢！
